СЕРІК СЕЙІТМАН
«ALQA» радиосының Бас редакторы
Қазақстан Жазушылар одағының мүшесі, ақын.
1982 жылғы 6 қаңтарда Түркістан облысы Отырар ауданында туған. 1999 жылы Отырар ауданы Шытты ауылындағы А.Дәрібаев атындағы орта мектепті, 2003 жылы Қ.А.Ясауи атындағы Халықаралық қазақ-түрік университеті Шымкент бөлімінің филология факультетін, 2008 жылы әл-Фараби атындағы Қазақ Ұлттық университетінің магистратурасын, 2021 жылы Қ.А.Ясауи атындағы Халықаралық қазақ-түрік университетінің докторантурасын бітірген.
2006-2018 жылдар аралығында Қазақ радиосында редактор-жүргізуші, шолушы, «Руханият» бас редакциясы Бас редакторының орынбасары, «Шалқар» ұлттық радиосының Бас редакторы, Қазақ радиосының директоры, «Қазақ радиолары» ЖШС Бас директорының орынбасары қызметтерін атқарды.
Радиобағдарламалар мен мегажобалардың авторы, жетекшісі. Атап айтқанда, 2014-2017 жылдар аралығында «Шалқар» ұлттық радиосының Бас редакторы ретінде жасаған имидждік роликтері көркемдік сапасы жоғары, ұлттық бояуы қанық дүниелер болды. Оған қоңыр үнді диктор Нұрлан Өнербаевтың дауысы өзгеше әр берді.
Серік Сейітманның идеясымен өмірге келген «Жаншуақ», «Жерұйық», «Темірқазық» этноэнциклопедиясы, «Ән-ғұмыр», «Күй-ғұмыр», «Отанды сүю», «Сөз патшасы», «Тәуелсіздік шежіресі», «Өнегелі отбасы», «Шабыт» радиотеатры, «Отырар кітапханасы», «Қазақ хандығы» сынды жаңа сүйекті хабарлар мен «Аударыспақ», «Жамбы ату», «Теңге ілу», «Арқан тартыс» секілді ұлттық ойындардың атымен аталған радиоойындар ұлттық радионың ұпайын түгендеуге айтарлықтай үлес қосты. Сонымен қоса, «Дәстүр», «Бесігіңді түзе», «Күй-шежіре», «Наридірген», «Назқоңыр», «Әлқисса», «Біздің елдің жігіттері», «Бастаңғы» секілді ұлттық маңызы бар хабарлар қайта жаңғырды.
Басшылық қызметте жүріп, өзі де хабарлар дайындап жүргізді. Олар бүгінде «Алтын қордың» қазынасына айналды.
2018-2021 жылдары докторантурада оқи жүріп, «Рухани жаңғыру» мемлекеттік бағдарламасы аясында қолға алынған «Тұлпар мініп, Ту алған» ұлттық жобасының жетекшісі, Астана қаласы әкімдігінің Жастар театрында Әдебиет бөлімінің меңгерушісі қызметтерін абыроймен атқарды.
Ақпарат және мәдениет саласында тәжірибе жиған азамат, ендігі шығармашылығын ғылыммен байланыстыруда: ҚР ҒЖБМ Мемлекет тарихы институтының кіші ғылыми қызметкері (2021-2022 жж.); ҚР ҒЖБМ Мемлекет тарихы институтының бөлім басшысы 2022-2023 жж.). Қазір Астана қаласы әкімдігінің жанынан құрылған «ALQA» радиосына басшылық қызметін бастап, негізін қалау ісіне жетекшілік етіп жатыр.
Алаш әдебиетіне байланысты ғылыми диссертациялық еңбегін жазуда. «Ұлттық код – мәйегіміз», «Абай және Алаш: Дәстүр сабақтастығы», «Абай, Алаш һәм Тәуелсіз Қазақстан мұраты» т.б. ғылыми мақалалары жарық көрген.
- Қазақ радиосы Көркемдік кеңесінің мүшесі (2012-2018 жж),
- Қазақстан Жазушылар одағының мүшесі,
- Қазақстан Авторлар қоғамының мүшесі,
- Халықаралық «Қазақ Тілі» қоғамының Құрметті мүшесі.
- «Жас тұлпар-2014» Республикалық сыйлығының иегері,
- Халықаралық «Шабыт» фестивалінің жеңімпазы,
- Төлеген Айбергенов атындағы әдеби сыйлықтың лауреаты,
- «Қазақ Хандығына-550 жыл» мерекелік медалінің иегері,
- «Қазақстан Тәуелсіздігіне-25 жыл» мерекелік медалінің иегері,
- Қазақстан Авторлар қоғамының лауреаты.
«Қырсық қызға қолтаңба», «Қазақтың қаны», «Қарашаңырақ», «Домбыра», «Қамшының сабы» атты жыр жинақтары жарық көрген. Оның ішінде «Домбыра», «Қамшының сабы» кітаптары мемлекеттік тапсырыспен шыққан.
Бірнеше өлеңіне әндер жазылған: оларды Нұрлан Өнербаев, Роза Рымбаева, МузАРТ тобы, «Жігіттер» тобы, Бауыржан Исаев, Жұбаныш Жексенұлы, Қарақат Әбілдина, Ұлту Қабаева, Медеу Арынбаев т.б. секілді өнер майталмандары орындап жүр.
2018 жылы ел астанасындағы Бейбітшілік және келісім сарайында авторлық кеші өтіп, ол республикалық «Хабар» арнасының эфирінен үздіксіз беріліп келеді.