Астанада ісмер әжелер ұлттық қолөнерді дәріптеп, шеберлік сабағын өткізді

Астана қаласының Байқоңыр ауданында Халықаралық әйелдер мерекесіне орай «80+ Әжелер» клубы оқушы қыз балалармен мерекелік кездесу өткізді. Шарада ісмер әжелер ұлттық қолөнерді дәріптеп, қыздарға тігіншілік өнері бойынша шеберлік сабағын көрсетті, деп хабарлайды елорда әкімдігінің ресми сайты.

Әжелерге арналған «80+ Әжелер» клубы өткен жылдың жаз айларынан бастап жұмыс істейді. Белсенді ұзақ өмір сүру орталығында құрылған клуб зейнеткерлерге ерекше мүмкіндіктер беруде. Атап айтсақ, мұнда әжелеріміз әртүрлі іс-шараларға қатысып, жас буынға өмірлік тәжірибелерін бөлісіп отыр.

«80+ Әжелер» клубының ашылуына қолөнер үйірмесінің жетекшісі Балым Өмірзақова мұрындық болған. Ал орталықта пішу, тігу, тоқыма тоқу сынды түрлі үйірмелер 3 жылдан астам уақыт жұмыс істеп келеді екен. Бүгінде одан 300-ден аса әже дәріс алыпты.

«Бұл – әлеуметтік жоба. Халықтың мәдени құндылықтары мен салт-дәстүрлерін жалғастыруды мақсат тұттық. Яғни ұрпақтан ұрпаққа ауысып келе жатқан ұлттық қолөнерімізді жаңғырту, жалғастыру болып саналады. Орталықтағы әжелер өздерінің өмір тәжірибесінен көрген қолөнердегі жұмыстарын жас буынға үйретіп отыр. Сондай-ақ, қаладағы кейбір үлкен апаларымыз орталық үйірмелеріне қатысып, қосымша сабақ та алады. Олардың арасынан да өз қабілетін көрсеткендер оқушыға қолөнер бұйымдарын тігуді үйретіп те жатыр» дейді Балым Өмірзақова.

Балымның сөзінше, биылғы Жұмысшы мамандықтар жылына орай, жобаның аты «Sheber Shop» деп аталыпты. Яғни орталықтағы әжелер өз бұйымдарын тігім қана қоймай, әлеуметтік желіде сата алады.